मेलबर्न – काठमाडौंतर्फ प्रस्थान गर्दैछिन् , अष्ट्रेलियन  विद्यार्थी इन्द्रा थोमस। सामान्यतया नेपालबाट अष्ट्रलिया अध्ययनका लागि जाने विद्यार्थीहरूको कथा सुन्ने हामीका लागि यो कथा भने फरक छ—यसपटक एक अष्ट्रेलियन विद्यार्थी नेपाल आउँदैछिन्, भाषा सिक्न, समाज बुझ्न र समुदायसँग प्रत्यक्ष जोडिन।

अष्ट्रेलियन सरकारको प्रतिष्ठित न्यासनल कोलम्बो प्लान छात्रवृत्ति कार्यक्रमअन्तर्गत इन्द्रा नेपाल आउन लागेकी हुन्। यो कार्यक्रमले अष्ट्रेलियन युवाहरूलाई इन्डो–प्यासिफिक क्षेत्रका देशहरूसँग शैक्षिक, सांस्कृतिक र व्यावसायिक सम्बन्ध विस्तार गर्ने अवसर प्रदान गर्दै आएको छ।

इन्द्राले जुनदेखि अगस्ट २०२६ सम्म नेपाली भाषा तालिम पूरा गर्नेछिन्। त्यसपछि उनी काठमाडौं विश्वविद्यालयमा सामुदायिक विकास विषयमा स्नातक तह अध्ययन गर्नेछिन्, जुन मार्च २०२७ सम्म सञ्चालन हुनेछ।

विदेशी भूमिमा भाषा सिक्नु केवल शब्द र व्याकरण बुझ्नु मात्र होइन, त्यो समाजको सोच, संस्कृति र जीवनशैली बुझ्ने ढोका पनि हो। त्यसपछि दोस्रो चरणमा उनी काठमाडौं विश्वविद्यालयमा सामुदायिक विकास विषयमा स्नातक तह अध्ययन गर्नेछिन्, जुन मार्च २०२७ मा सम्पन्न हुनेछ।

नेपालजस्तो विविधता र सम्भावनाले भरिएको देशमा अध्ययन गर्नु इन्द्राका लागि केवल शैक्षिक यात्रा मात्र हुने छैन, यो जीवन अनुभव बन्नेछ। ग्रामीण समुदाय, स्थानीय पहल, सामाजिक संरचना र विकासका चुनौतीहरू नजिकबाट बुझ्ने अवसरले उनको दृष्टिकोणलाई फराकिलो बनाउने अपेक्षा गरिएको छ।

अष्ट्रेलियाबाट नेपाल आउने यस्ता विद्यार्थीहरू केवल अध्ययनका लागि मात्र आउँदैनन्, उनीहरू दुई देशबीचको सांस्कृतिक सेतु पनि बन्छन्। उनीहरूले यहाँ सिकेका अनुभव, सम्बन्ध र बुझाइलाई आफ्नो देशमा फर्केर पनि विस्तार गर्छन्, जसले दीर्घकालीन सहकार्यको आधार तयार पार्छ।

नेपाल प्रस्थान गर्नु अघि भिक्टोरियास्थित नेपाली वाणिज्य दूत निराजन गौलीले इन्द्रालाई शुभकामना दिँदै नेपालमा अध्ययनले उनलाई समृद्ध अनुभव दिने विश्वास व्यक्त गरेका थिए।

आजको विश्वमा शिक्षा केवल कक्षाकोठामा सीमित छैन। अन्तर्राष्ट्रिय विद्यार्थी आदानप्रदान कार्यक्रमहरूले नयाँ दृष्टिकोण, सहकार्य र समझदारीको ढोका खोलिरहेका छन्। इन्द्रा थोमसको यो यात्रा त्यसैको एउटा उदाहरण हो—जहाँ शिक्षा, संस्कृति र मानव सम्बन्ध एकसाथ अगाडि बढिरहेका छन्।

इन्द्रा थोमसलाई सफल अध्ययन यात्राको हार्दिक शुभकामना।