छत्र शंकर (मेलबर्न) । बिहीबार साँझदेखि  मेलबर्नको ब्रन्सविक क्षेत्रबाट हराएकी नेपाली आमा परिवारको सम्पर्कमा आउनुभएको छ । करिब २६ घण्टापछि  घरबाट  ३५ किलोमिटर पर कलिङ्बुड भन्ने क्षेत्रमा उहाँ शुक्रवार साँझ फेला पर्नुभएको हो ।

उक्त क्षेत्रको कलेज एरियामा बसिरहेकी आमालाई नेपाली भाइबहिनीहरूले  फेला  पारेको पारिवारिक स्रोतले जनाएको छ ।  सरस्वती शुक्रबार साँझ करिब ९:३० फेला पर्नुभएको हो ।  हाल परिवारसँगै रहेकी आमाको स्वास्थ्य अवस्था  सामान्य रहेको उनको परिवारले जानकारी दिएको छ । नवलपरासी घर भएकी आमा  तीन महिनाअघि  छोराछोरीलाई भेट्न मेलबर्न आउनुभएको थियो । 

उहाँको खोजीका लागि  परिवारले स्थानीय समुदाय र प्रहरीको सहयोग मागेको थियो । स्थानीय प्रहरी, एनआरएनए  भिक्टोरिया  राज्य समिति तथा   भिक्टोरियाको नेपाली समाजले विभिन्न माध्यमबाट खोजी कार्य तीव्र पारेपछि आमा हराएको २६ घण्टापछि सकुशल फेला पर्नुभएको हो ।