🔹 संक्षेपमा

– पर्थ विमानस्थलमा १ लाख डलरसहित २१ वर्षीय पाकिस्तानी युवक समातिए
– अर्कैको नाममा मेलबर्न जाने प्रयास
– $५० का नोटको गड्डी ब्यागमा फेला
– AFP द्वारा थप अनुसन्धान जारी

पर्थ,अष्ट्रेलियाको पर्थ विमानस्थलमा करिब १ लाख अष्ट्रेलियन डलर नगद सहित एक पाकिस्तानी नागरिक पक्राउ परेका छन्। अष्ट्रेलियन संघीय प्रहरीले  जारी गरेको मिडिया रिलिज अनुसार, २१ वर्षीय युवक अर्कै व्यक्तिको नाममा मेलबर्न जान लागेका बेला समातिएका हुन्।

घटनाको प्रारम्भ पर्थ एयरपोर्टको सुरक्षा चेकपोइन्टमा भएको हो, जहाँ एक्स-रे स्क्यानिङ गर्दा युवकको ह्यान्ड क्यारी सुटकेसमा ठूलो मात्रामा नगद भेटिएको थियो। उनले लगेज उठाएर सुरक्षाबाट बाहिरिएपछि सुरक्षाकर्मीले एपिएफ लाई खबर गरे।

AFP अधिकारीहरूले तत्काल विमानभित्रै प्रवेश गरी युवकलाई विमानबाट बाहिर ल्याए। सो क्रममा जाँच गर्दा उनको ह्यान्ड ब्याग र ब्याकप्याक दुवैमा $५० का नोटको गड्डी फेला परेको थियो।

युवकविरुद्ध नक्कली परिचयमा यात्रा प्रयास र अज्ञात स्रोतको ठूलो रकम राखेको आरोपमा मुद्दा दायर गरिएको छ। संघीय प्रहरीले उक्त नगद कसरी प्राप्त भयो भन्नेबारे थप अनुसन्धान गरिरहेको जनाएको छ।