अष्ट्रेलियाको फेडरल कोर्टले अपाङ्गता सेवा प्रदायक संस्था Oak Tasmania लाई राष्ट्रिय अपाङ्गता बीमा योजना (NDIS) अन्तर्गत सेवाग्राहीप्रति गम्भीर लापरवाही गरेको ठहर गर्दै ११ लाख अष्ट्रेलियन डलर जरिवाना तिराउने आदेश दिएको छ।

अदालतका फैसलाअनुसार Oak Tasmania ले कुल ४७४ वटा सेवा असफलता गरेको प्रमाणित भएको छ। तीमध्ये एक गम्भीर घटनामा मधुमेह पीडित एक सेवाग्राहीलाई आवश्यक इन्सुलिन समयमै नदिइँदा उनको स्वास्थ्य अवस्था जटिल बनेको र अन्ततः अस्पताल भर्ना गर्नुपरेको थियो।

त्यसैगरी, संस्थाले गम्भीर अपाङ्गता भएका एक बालकलाई आवश्यक निगरानी नगरेको, तथा कानुनबमोजिम अनिवार्य रहेको घटना प्रतिवेदन (incident reporting) पटक–पटक तोकिएको समयसीमाभित्र सम्बन्धित निकायमा नबुझाएको पनि अदालतले पुष्टि गरेको छ।

Oak Tasmania, अपाङ्गता सेवा समूह Possability को सहायक संस्था हो। अदालतले जरिवानासँगै संस्थालाई थप २ लाख अष्ट्रेलियन डलर कानुनी खर्च समेत भुक्तानी गर्न आदेश दिएको छ।

फैसलापछि Oak Tasmania ले विज्ञप्ति जारी गर्दै आफ्ना कमजोरी स्वीकार गरेको र सेवाप्रणाली सुधारका लागि व्यापक आन्तरिक संरचनागत सुधारहरू सुरु गरिएको जनाएको छ।