मेलबर्न- अष्ट्रेलियाको संघीय निर्वाचन २०२५ का लागि अग्रिम मतदान आधिकारिक रूपमा सुरु भइसकेको छ। मतदान गर्ने योग्यता भएका व्यक्तिहरूले अब मे ३ शनिबारको निर्वाचन दिनभन्दा पहिले नै आफ्नो मत खसाल्ने अवसर पाएका छन्।

कसले अग्रिम मतदान गर्न सक्छ?

यदि निर्वाचनको दिन तपाईंले निम्नमध्ये कुनै पनि कारणले मतदान केन्द्रमा जान सक्नुहुन्न भने, तपाईं व्यक्तिगत रूपमा वा हुलाकमार्फत अग्रिम मतदान गर्न सक्नुहुन्छ:

• तपाईं आफ्नो नाम दर्ता भएको निर्वाचन क्षेत्रभन्दा बाहिर हुनुहुन्छ
• तपाईं कुनै मतदान केन्द्रबाट ८ किमीभन्दा टाढा हुनुहुन्छ
• तपाईं यात्रा गरिरहनु भएको छ
• तपाईंको कार्यस्थलबाट छुट्टिन सक्ने अवस्था छैन
• तपाईं गम्भीर बिरामी, अशक्त हुनुहुन्छ वा चाँडै सुत्केरी हुने तयारीमा हुनुहुन्छ (वा त्यस्तो व्यक्तिको हेरचाह गर्दै हुनुहुन्छ)
• तपाईं अपांगता भएको व्यक्ति हुनुहुन्छ (वा त्यस्तो व्यक्तिको हेरचाह गर्दै हुनुहुन्छ)
• तपाईं अस्पतालमा हुनुहुन्छ र त्यहीँ मतदान गर्न सकिँदैन
• तपाईंको धार्मिक विश्वासले मतदान केन्द्रमा जान रोक लगाउँछ
• तपाईं तीन वर्षभन्दा कम सजाय काटिरहनु भएको जेलमा हुनुहुन्छ वा अन्य कुनै थुनामा हुनुहुन्छ
• तपाईं “साइलेंट इलेक्टर” हुनुहुन्छ
• तपाईं आफ्नो सुरक्षाको उचित चिन्ता गर्नुहुन्छ

कसरी अग्रिम मतदान गर्ने?

व्यक्तिगत रूपमा:

नजिकको अग्रिम मतदान केन्द्रमा जानुहोस्। यी केन्द्रहरू नियमित मतदान केन्द्रजस्तै काम गर्छन्, तर निर्वाचन दिनभन्दा अगाडि नै खुला हुन्छन्।

हुलाकबाट:

अष्ट्रेलियन इलेक्टोरल कमिसन (AEC) को माध्यमबाट बुधबार, अप्रिल ३० को साँझ ६ बजेसम्म पोस्टल भोटको लागि आवेदन दिन सकिन्छ। मतपत्र प्राप्त गरेपछि, निर्दिष्ट निर्देशनअनुसार भरेर फिर्ता पठाउनुहोस्।

फोनमार्फत:

आँखा देख्न असक्षम, न्यून दृष्टि भएका वा अन्टार्कटिकामा कार्यरत मतदाताले AEC को टेलिफोन मतदान सेवा प्रयोग गर्न सक्नेछन्।

अग्रिम मतदान केन्द्र कहाँ छ?

नजिकको अग्रिम मतदान केन्द्र पत्ता लगाउन AEC को वेबसाइटमा गई “before election day” विकल्प छानेर स्थान खोजी गर्न सकिन्छ।

तपाईँको मतपत्र बुझ्नुस्

मतदान गर्दा तपाईंले दुईवटा मतपत्र प्राप्त गर्नुहुन्छ:

• हाउस अफ रिप्रजेन्टेटिभ्स (हरियो पाना): तपाईंको निर्वाचन क्षेत्रका उम्मेदवारहरूलाई प्राथमिकताको आधारमा सबै बक्समा क्रमसँग अंक हाल्नुपर्छ।
• सेनेट (सेतो पाना):
  • लाइनमाथि: तपाईंले मन पराएका कम्तीमा ६ वटा पार्टीलाई क्रमसँग अंक दिन सक्नुहुन्छ।
  • लाइनमुनि: तपाईंले व्यक्तिगत उम्मेदवारहरूलाई क्रमसँग कम्तीमा १२ वटा बक्स भर्नुपर्छ।

तपाईंको मत मान्य बनाउन निर्देशनहरू ध्यानपूर्वक पालना गर्नुहोस्।