अष्ट्रेलियाली नौसेनाले न्यूजिल्याण्डको इन्टरनेट र रेडियो सेवा अवरुद्ध गर्यो!
नेपालआईज
क्यानबेरा, अष्ट्रेलियाको सबैभन्दा ठूलो युद्धपोत एचएमएएस क्यानबेराले न्यूजिल्याण्डको उत्तर र दक्षिण दुबै टापुका केही क्षेत्रहरूमा अनिच्छित रूपमा इन्टरनेट र रेडियो सेवामा अवरोध पुर्याएको पुष्टि भएको छ।
यो घटना बुधबार बिहान दुई बजे कुक स्ट्रेट हुँदै वेलिङ्टन प्रवेश गर्दै गर्दा घटेको हो। एचएमएएस क्यानबेराको उच्च शक्ति भएको नेभिगेसन रडारले पाँच गिगाहर्ज फ्रिक्वेन्सीमा चल्ने वायरलेस उपकरणहरूसँग हस्तक्षेप गर्दा टारानाकी र मार्लबोरो क्षेत्रमा इन्टरनेट र रेडियो सेवा पूर्ण रूपमा अवरुद्ध भयो।
स्थानीय इन्टरनेट सेवा प्रदायकहरूका अनुसार, रडारको हस्तक्षेपले ती वायरलेस उपकरणमा जडान गरिएको सुरक्षात्मक स्विच सक्रिय भएर नेटवर्कहरू स्वतः बन्द भएका थिए। यो सुरक्षा प्रणाली न्यूजिल्याण्डको आकाशीय क्षेत्रमा रडार संकेतसँग हस्तक्षेप हुन नदिन प्रयोग गरिन्छ।
घटनाको जानकारी रेडियो स्पेक्ट्रम व्यवस्थापन विभागलाई दिइएको थियो, जसले न्यूजिल्याण्डको रक्षा निकायलाई सूचित गर्यो र त्यसपछि अष्ट्रेलियाली रक्षा बललाई जानकारी दिइयो।
अष्ट्रेलियाली रक्षा विभागका प्रवक्ताले भने, “घटनाबारे जानकारी पाएपछि एचएमएएस क्यानबेराले तुरुन्तै रडारको फ्रिक्वेन्सी परिवर्तन गर्यो र समस्या समाधान भयो। अहिले कुनै सेवा प्रभावित छैन।”
प्रिमो नामक न्यूजिल्याण्डको इन्टरनेट सेवा प्रदायक कम्पनीका प्रबन्ध निर्देशक म्याथ्यु ह्यारिसनले लेखे, “यो सामान्य गडबडी थिएन – पूरै सैन्य स्तरको रडार हस्तक्षेपले हाम्रो नेटवर्कमा लहरजस्तै प्रभाव पारेको थियो। युद्धपोतले हाम्रा उपकरण नै अफलाइन बनायो!”
उनले यो घटनाले न्यूजिल्याण्डको ग्रामीण क्षेत्रमा रेडियो फ्रिक्वेन्सी प्रणाली कति संवेदनशील छ भन्ने कुरामा ध्यानाकर्षण भएको बताए।
एचएमएएस क्यानबेराको यो भ्रमण क्यानबेरा र वेलिङ्टनबीचको सिस्टर सिटी सम्बन्धको उत्सव स्वरूप भएको हो। युद्धपोत र त्यसका चालक दललाई स्वागत गर्न शनिबार परेड र सांगीतिक कार्यक्रम आयोजना गरिने कार्यक्रम छ।
Source: ABC
