अष्ट्रेलियामा सन् २०२६ जनगणनाका लागि १०० दिनभन्दा कम समय बाँकी, सबैलाई सहभागी हुन आग्रह
नेपालआईजमेलबर्न । अष्ट्रेलियामा सन् २०२६ को राष्ट्रिय जनगणना हुन अब १०० दिनभन्दा कम समय बाँकी रहेको छ। आगामी मंगलबार ११ अगस्ट २०२६ मा हुने जनगणनाले पछिल्ला पाँच वर्षमा देशमा आएको सामाजिक, आर्थिक र जनसांख्यिक परिवर्तनको विस्तृत तथ्याङ्क संकलन गर्नेछ।
Australian Bureau of Statistics ले सञ्चालन गर्ने जनगणनामा अष्ट्रेलियामा बसोबास गर्ने प्रत्येक व्यक्ति र घरधुरीको विवरण संकलन गरिनेछ। यसमा स्वास्थ्य, शिक्षा, सांस्कृतिक पृष्ठभूमि, रोजगारी तथा बसोबास सम्बन्धी विभिन्न प्रश्न समावेश हुनेछन्।
जनगणनाबाट प्राप्त तथ्याङ्कले विद्यालय, स्वास्थ्य सेवा, यातायात तथा पूर्वाधार योजना बनाउन सरकारलाई सहयोग गर्ने जनाइएको छ। साथै स्थानीय परिषद्, गैरनाफामूलक संस्था तथा व्यवसायिक क्षेत्रलाई समुदायअनुसार सेवा विस्तार गर्न पनि उपयोगी हुने बताइएको छ।
जनगणनाकी राष्ट्रिय प्रवक्ता Emily Walter ले प्रत्येक उत्तर महत्वपूर्ण हुने बताउँदै सबैलाई सही विवरण उपलब्ध गराउन आग्रह गरेकी छन्।
अष्ट्रेलियामा जनगणनामा सहभागी हुनु कानुनी रूपमा अनिवार्य छ। भिसा अवस्थाको परवाह नगरी जनगणनाको राति देशभित्र रहेका सबै व्यक्तिले सहभागिता जनाउनुपर्नेछ। यसमा घरमा बसिरहेका पाहुना, अस्थायी कामदार, अन्तर्राष्ट्रिय विद्यार्थी तथा पर्यटकसमेत समावेश हुनेछन्।
जनगणनामा उपलब्ध गराइने व्यक्तिगत जानकारी गोप्य राखिने Australian Bureau of Statistics ले जनाएको छ। कानुनअनुसार ती विवरण अन्य सरकारी निकायलाई समेत व्यक्तिको पहिचान खुल्ने गरी उपलब्ध गराउन नमिल्ने व्यवस्था रहेको छ।
अधिकांश घरधुरीले हुलाकमार्फत निर्देशनसहित पत्र प्राप्त गर्नेछन्। जनगणना अनलाइन वा कागजी फाराममार्फत भर्न सकिनेछ। आवश्यकता परेकाहरूका लागि फोन सहायता, अनलाइन सहयोग, सूचना केन्द्र तथा अनुवादित सामग्रीसमेत उपलब्ध गराइनेछ।
थप जानकारीका लागि: Census Language Information
