काठमाडौँ । तालिबान सरकार अफगानिस्तानमा छात्राहरूको उच्च विद्यालय खोल्ने प्रतिबद्धताबाट पछि हटेको छ । तालिबान प्रशासनले छात्राहरूको लागि ड्रेसको निर्णय नभएकोले तत्काल उनीहरुका विद्यालय नखुल्ने बताएको छ ।

अगस्ट २०२१ मा तालिबानले अफगानिस्तानमा नियन्त्रण लिएपछि देशभरका विद्यालयहरू बन्द गरिएका थिए । विद्यालय खुल्ने बताइरहेको तालिबानले आफ्नो निर्णयमा अचानक यू-टर्न लिदै आफ्नै निर्णयबाट पछि हटेको छ ।

शिक्षा मन्त्रालयले अकस्मात बालिका माध्यमिक विद्यालय बन्द गर्ने घोषणा गरेको छ । यसले अन्योल सिर्जना गरेको छ । तालिबान सरकारको यो घोषणापछि केही छात्राहरु रोएका छन् ।

कतिपय छात्राहरू र उनीहरूका अभिभावकहरू रिसाएका छन् र तालिबानले अन्तिम समयमा लिएको यो निर्णयप्रति आक्रोश पोखेका छन् ।

तालिबानले पोसाक बारे निर्णय लिएपछि विद्यालय खोल्ने बताएको छ ।

एक साताअघि शिक्षा मन्त्रालयले बालिका विद्यालयसहित देशका सबै विद्यालय बुधबारबाट खोल्ने घोषणा गरेको थियो । तर अहिले भने ‘सबै बालिका विद्यालय र छोरी पढ्ने विद्यालय अर्को आदेश नभएसम्मका लागि बन्द रहने’ भनिएको छ । ,

छात्राहरुको पोसाक मिलाएर मात्रै विद्यालय खोलिने सूचनामा उल्लेख छ । पोशाक ‘शरियत कानून र अफगान परम्परा’ अनुसार हुने तालिबानले बताएको छ ।

तर पोशाक नलगाएको भन्दै विद्यालय नखोल्ने निर्णयले बालिकाका अभिभावक निकै आक्रोशित भएका छन् ।

विद्यालय खोल्ने विषयमा तालिवानमा मतभेद

अफगानिस्तानमा ९० को दशकमा तालिवान शासनकालमा बालिका शिक्षामा प्रतिबन्ध लगाइएको थियो । यसपछि, तालिबानले गत वर्ष देश पुन: कब्जा गरेपछि, छात्रहरूको विद्यालय र केटीहरूको मात्र प्राथमिक विद्यालयहरू खोल्न अनुमति दिइएको थियो ।

तालिबानी नेताहरु बीच छात्रालाई विद्यालय पठाउने विषयमा अझै पनि कट्टरपन्थी सदस्यहरूबीच विवाद छ ।

तालिबानले अन्तिम समयमा गरेको यो निर्णयलाई लिएर संगठनभित्रै फूट देखिएको छ ।

अन्तर्राष्ट्रिय समुदायलाई दबाबको अपील

महिला अधिकारकर्मी र अफगान महिला नेटवर्ककी संस्थापक महोबा सिराज तालिबानले केटीहरूको विद्यालय खोल्ने यु-टर्नबाट छक्क परेकी छन् । उनले बीबीसीलाई भनिन्, ‘तिमीले हिजाब राम्रोसँग नलगाएको बहाना बनायो । यस्तो कुनै नियम छैन। हिजाब राम्ररी लगाउन नसकेको उनले आज बिहान निर्णय गरे । उनले यो निर्णय कसरी गरे थाहा छैन ।’

अन्तर्राष्ट्रिय समुदायले तालिबानसामु विदेशी कोष चाहियो भने महिला र छात्रालाई शिक्षा लिन पाउनुपर्ने शर्त राखिरहेको छ ।

नोबेल शान्ति पुरस्कार विजेता तथा पाकिस्तानकी महिला अधिकारकर्मी मलालाले पनि ट्वीट गर्दै यस विषयमा आफ्नो धारणा राखेकी छिन् । उनले लेखेका छन्- ‘मलाई आज एउटा आशा थियो कि अफगानिस्तानका स्कूल जाने केटीहरूलाई फिर्ता पठाइने छैन । तर तालिवानले आफ्नो वाचा पूरा गरेनन् । शिक्षित केटीहरू र सशक्त महिलाहरूसँग डराउने भएकाले छात्राहरूलाई सिक्नबाट रोक्ने बहाना खोजिरहनेछन् ।