मेलबर्न। भिक्टोरिया स्थित नेपाली वाणिज्य दूतको कार्यालयले नेपाल भ्रमण गर्न चाहने पर्यटकहरूका लागि नयाँ अनलाइन भिसा आवेदन प्रक्रिया सुरू गरेको छ। नयाँ प्रणालीमार्फत अब आवेदकहरूले व्यक्तिगत रूपमा उपस्थित नभई नै भिसा आवेदन दिन सक्नेछन्, जसले प्रक्रिया थप सहज र प्रभावकारी बनाउने वाणिज्यदूत निराजन गौलीले जानकारी दिए।

वाणिज्य दूतको कार्यालयका अनुसार, आवेदकहरूले nepalconsulatevictoria.com.au वेबसाइटमा गएर ‘Visa to Nepal’ खण्ड चयन गर्नुपर्नेछ। त्यसपछि, अनलाइन आवेदन लिङ्कमा क्लिक गरी ‘Embassy/Consulate/Mission’ अप्सनमा “Vic” टाइप गरी Honorary Consul of Nepal, Victoria चयन गर्नुपर्छ।

आवेदकहरूले पासपोर्ट साइजको फोटो र पासपोर्टको स्क्यान गरिएको प्रतिलिपि (PDF) अपलोड गर्नुपर्नेछ, जसको फाइल साइज २ MB भन्दा बढी हुनुहुँदैन। आवेदन फारम पूरा गरी बुझाएपछि M अक्षरबाट सुरू हुने सबमिशन ID प्राप्त हुनेछ। त्यसपछि, विवरणहरू ठीक छ भनी सुनिश्चित गरेपछि तोकिएको बैंक खातामा भिसा शुल्क जम्मा गर्नुपर्छ।

भिसा शुल्क जम्मा गर्न आवश्यक बैंक विवरणः

खाता नाम: Consulate of Nepal (VIC)
BSB: 033338
A/C नं.: 669271

वाणिज्य दूताका अनुसार, अब आवेदकहरूले आफ्नो मूल पासपोर्ट डाकमार्फत पठाउनु पर्दैन। आवेदन फारममा हार्डकपी बुझाउनु पर्ने उल्लेख भए पनि केवल सफ्ट कपी मात्र पर्याप्त हुने स्पष्ट गरिएको छ। एक पटक आवेदन प्रक्रिया पूरा भएपछि, भिसा इमेलमार्फत पठाइने छ, जसले प्रतीक्षा समय घटाउनेछ र सम्पूर्ण प्रक्रिया सरल बनाउनेछ।

आवेदकहरूलाई इमेलको इनबक्स तथा स्प्याम वा जंक फोल्डर समेत जाँच गर्न अनुरोध गरिएको छ, ताकि उनीहरूले आफ्नो भिसा अनुमोदनपत्र समयमा नै प्राप्त गर्न सकून्।

नयाँ डिजिटल प्रणालीले अष्ट्रेलियाबाट नेपाल भ्रमण गर्न चाहने पर्यटकहरूको भिसा आवेदन प्रक्रिया अझ सहज बनाएको छ।