छत्र शंकर–

मेलबर्न क्रिकेट ग्राउन्ड (MCG) मा गएराति भएको एक अप्रत्याशित घटनाले शहरलाई ठूलो दुर्घटनाबाट जोगाएको छ। करिब ८२,००० दर्शकको उपस्थितिमा क्यारल्टन र कोलिङवुडबीच प्रतिस्पर्धात्मक खेल चलिरहेका बेला दुई जना हतियारधारी युवक पक्राउ परेका हुन्।

साँझ करिब ८:३० बजे सुरक्षा गार्डले असहज व्यवहार गरिरहेका ती दुई युवालाई स्टेडियम छाड्न आग्रह गरेपछि उनीहरूले अस्वीकार गरे, जसपछि प्रहरीलाई बोलाइएको थियो। प्रहरीले ती दुवैलाई नियन्त्रणमा लिएर खानतलासी गर्दा उनीहरूको पाइन्टभित्र लुकाइएको अवस्थामा हतियार फेला परेको बताइएको छ। सौभाग्यवश, घटनामा कोही पनि घाइते भएका छैनन्।

पक्राउ परेका २७ वर्षीय ब्रडमेडोज निवासी र २१ वर्षीय रक्सबर्ग पार्क निवासी युवकलाई हिरासतमा लिइएको छ र आज मेलबर्न मजिस्ट्रेट अदालतमा उपस्थित गराइएको छ। प्रारम्भिक अनुसन्धान अनुसार ती युवकहरू हतियारसहित स्टेडियमभित्र प्रवेश गरेका थिए, जसले हालै मात्र जडान गरिएको अत्याधुनिक सुरक्षा संयन्त्रको विश्वसनीयतामाथि गम्भीर प्रश्न उठाएको छ।

MCG मा प्रयोगमा ल्याइएको सुरक्षा प्रणालीमा आर्टिफिसियल इन्टेलिजेन्स (AI) र आधुनिक सेन्सर प्रविधिको प्रयोग गरिएको भए तापनि, प्रणाली निर्माण गर्ने अमेरिकी कम्पनीले हालै सामूहिक मुद्दा समाधान गर्दै प्रणालीको क्षमताबारे “बढी दाबी गरिएको” स्वीकार गरिसकेको छ।

घटनापछि प्रहरीले थप अनुसन्धान अघि बढाएको छ। यति संवेदनशील सामग्री कसरी सुरक्षा प्रणाली छलेर स्टेडियमभित्र प्रवेश गरियो भन्ने विषयमा विस्तृत छानबिन हुने जनाइएको छ। साँच्चै भन्नुपर्दा, गएराति मेलबर्नले भाग्यमै भरोसा गरेर ठूलो दुर्घटनाबाट आफूलाई जोगाएको हो।