क्वीसल्याण्ड – ब्रिस्बेनस्थित एक ज्वेलरी पसलमा पाँच हप्ता अघि भएको लुटपाट घटनामा संलग्न १६ वर्षीय किशोरसहितका लुटेरा समूहलाई प्रहरीले पक्राउ गरेको छ। क्वीन्सल्याण्ड प्रहरीले जानकारी दिएको अनुसार, जुन १० तारिख साँझ ५ बजे, चर्मसाइडस्थित जिम्पी रोडमा रहेको पसलमा  लुटेराहरू प्रवेश गरी लाखौं डलर बराबरको गरगहना लुटेका थिए।

सीसीटीभी फुटेजमा देखिए अनुसार, अनुहार छोपेका लुटेराहरूले शोकेस फुटाउँदै गरगहना बोरा भित्र हाल्दै पसलधनी र उनकी श्रीमतीलाई आतंकित बनाएका थिए। घटनामा पसलका पुरुष धनीको टाउकोमा हतौडाले प्रहार गरिएको बताइएको छ।

लुटपछिको भागदौडमा उनीहरू चोरीको शंका गरिएको Honda CR-V गाडीमा फरार भएका थिए।

प्रहरीले गत हप्ता देखिनै ब्रिस्बेनका विभिन्न स्थानमा खोजतलास, घर तथा गाडीहरूमा खानतलासी गर्दै लुटपाटसँग सम्बन्धित सामानहरू बरामद गरेको जनाएको छ।

मंगलबार, २५ वर्षीय कार्सेलडाइन निवासी र २२ वर्षीय गुड्ना निवासी एक गाडी स्टपको क्रममा पक्राउ परेका थिए। उनीहरूलाई गम्भीर शारीरिक क्षति पुर्‍याउने प्रयास, हतियारसहितको लुटपाट, चोरीको गाडीको प्रयोग, र बालबालिकालाई जोखिममा पार्ने जस्ता अभियोगमा मुद्दा दर्ता गरिएको छ।

त्यस्तै, गुड्नाबाट २५ वर्षीय, इनालाबाट २९ वर्षीय र लोगनलियाबाट २० वर्षीय पुरुषहरू समेत पक्राउ परेका छन्।

१६ वर्षीय एक किशोरलाई समेत सोही अभियोगमा पक्राउ गरिएको छ, जसमा गम्भीर चोट पुर्‍याउने मनसाय, लुटपाट, चोरी प्रयास, अवैध सवारी प्रयोग, मादक पदार्थ तथा सम्पत्ति सम्बन्धी गम्भीर अपराधहरू समावेश छन्।

सभी अभियुक्तहरूलाई बुधबार ब्रिस्बेन म्याजिस्ट्रेट अदालतमा पेश गरिएको थियो।

प्रहरीका अनुसार, उनीहरू अझै Mount Gravatt क्षेत्रका २१ वर्षीय एक फरार व्यक्तिको खोजीमा छन्, जो प्रायः लोगन र इनाला क्षेत्रहरूमा देखिने गर्दछन्।

अनुसन्धानकर्ताहरूले चर्मसाइड लुटपाटसँगै गत महिना लुटवाइचे मा भएको अर्को घटनाबीच सम्बन्ध हुनसक्ने आशंका गरिरहेका छन्।

प्रहरीका वरिष्ठ निरीक्षक केन रोजर्सले भने, “सुरक्षा सुनिश्चित गर्न यी आरोपितहरूलाई चाँडो चिन्ने र पक्राउ गर्ने हाम्रो पहिलो प्राथमिकता थियो। अनुसन्धान टोली दिनरात खटिएर अहिलेको परिणाममा पुगेको हो। बाँकी आरोपीहरूलाई पनि न्यायिक दायरामा ल्याइनेछ।