अष्ट्रेलियाबाट एक विदेशी नागरिकलाई देश निकाला,’घृणा र समाज भड्काउनेलाई कुनै स्थान छैन’
नेपालआईजक्यान्बेरा / अष्ट्रेलियाले देशको कानुन र सामाजिक सद्भाव उल्लङ्घन गरेको भन्दै एक विदेशी नागरिकलाई देश निकाला गरेको छ । एक साउथ अफ्रिकन नागरिकको भिसा रद्द गर्दै उनलाई अब अष्ट्रेलिया कहिल्यै फर्कन नपाउने गरी देशनिकाला गरिएको हो । अष्ट्रेलियाको गृह मन्त्रालयको यो कडा कदमले देशको कानुन नमान्ने वा समाज भड्काउन खोज्नेलाई कुनै स्थान नहुने प्रष्ट सन्देश दिएको छ ।
के थियो घटना?
देश निकाला गरिएका ती व्यक्ति, म्याथ्यु ग्रुटर , न्यू साउथ वेल्स को संसद भवन बाहिर नोभेम्बर ८ मा भएको एक नव-नाजी प्रदर्शनमा सहभागी भएका थिए ।
उनी प्रदर्शनको अगाडिको लहरमा कालो पोशाकमा उभिएका थिए ।
यो प्रदर्शन कुख्यात नव-नाजी समूह नेसनल सोसलिस्ट नेटवर्कले आयोजना गरेको थियो ।
प्रदर्शनकारीहरूले ‘Abolish the Jewish lobby’ लेखिएको ब्यानर प्रदर्शन गरेका थिए र उनीहरूले बारम्बार ‘रगत र सम्मान (blood and honour)’ भन्ने नारा लगाएका थिए, जुन हिटलर युवा (Hitler Youth) सँग सम्बन्धित नारा हो ।
ग्रुटरले सामाजिक सञ्जालमा पोस्ट गरेका तस्बिरहरूमा पनि यही हिटलर युवाको नारा कुँदिएको चाँदीको ब्रेसलेट लगाएको देखिएको थियो
सरकारको कडा सन्देश
गृह मामिला मन्त्री टोनी बर्कले ग्रुटरको भिसा रद्द गर्ने निर्णयलाई पुष्टि गर्दै कडा टिप्पणी गरेका छन् ।
“यदि तपाईं भिसामा हुनुहुन्छ भने तपाईं पाहुना हो । यदि तपाईं नागरिक हुनुहुन्छ भने तपाईं अष्ट्रेलियन परिवारको पूर्ण सदस्य हुनुहुन्छ,” उनले भने ।
“जुनसुकै घरमा पनि, यदि कोही पाहुना आएर घृणा देखाउँछ र घरलाई भत्काउन खोज्छ भने, उसलाई घर फर्किने बेला भयो भनेर भन्न सकिन्छ ।” – टोनी बर्क, गृह मामिला मन्त्री
ग्रुटर र उनकी श्रीमती सन् २०२२ को शुरुवातमा एक अष्ट्रेलियन व्यवसायको प्रायोजनमा काम गर्ने भिसामा अष्ट्रेलिया आएका थिए । उनी इन्जिनियरिङ र डिजाइन फर्म ओरेकनमा कार्यरत रहेको अनलाइन जानकारीले देखाएको छ, यद्यपि कम्पनीले उनको भिसा रद्द भएकोबारे टिप्पणी गर्न अस्वीकार गरेको छ ।
अष्ट्रेलिया सरकारको यो निर्णयले विदेशी नागरिकहरूका लागि एउटा स्पष्ट रेखा कोरेको छ: यहाँ बस्ने सबैले देशको कानुन र सामाजिक मूल्य-मान्यतालाई सम्मान गर्नुपर्छ । घृणा र द्वेष फैलाउने, वा समाज भड्काउने जस्ता जघन्य अपराध गर्नेहरूलाई अष्ट्रेलियामा कुनै पनि हालतमा स्वीकार गरिने छैन ।
