मेलबर्न / अष्ट्रेलियामा इन्धनको मूल्य अझै बढ्ने संकेत देखिएको छ। चीनले आफ्ना तेल रिफाइनरीहरूलाई अष्ट्रेलियासहित विदेशी बजारमा इन्धन निर्यात रोक्न निर्देशन दिएको समाचार सार्वजनिक भएपछि आपूर्ति संकटको चिन्ता बढेको हो।

अष्ट्रेलियाको प्रतिष्ठित आर्थिक पत्रिका Australian Financial Review का अनुसार चीनले हालै आफ्ना रिफाइनरी कम्पनीहरूलाई सबै प्रकारका इन्धन निर्यात अस्थायी रूपमा रोक्न सूचना दिएको छ। यस निर्णयका कारण अष्ट्रेलियातर्फ पठाइने तयारीमा रहेका कम्तीमा दुईवटा इन्धन कार्गो पनि अनिश्चित बनेका छन्।

यससँगै मध्यपूर्व क्षेत्रमा बढ्दो द्वन्द्वले विश्वव्यापी तेल आपूर्ति थप अस्थिर बनाएको छ। विश्वकै सबैभन्दा महत्वपूर्ण तेल ढुवानी मार्ग मानिने Strait of Hormuz क्षेत्रमा दुईवटा ढुवानी जहाज विस्फोटमा परेपछि अन्तर्राष्ट्रिय समुद्री मार्गमा सुरक्षा चिन्ता बढेको छ।

विश्लेषकहरूका अनुसार यस्तो घटनापछि जहाज कम्पनीहरू उक्त मार्ग प्रयोग गर्न हिच्किचाउन सक्छन्, जसले तेल ढुवानीमा ढिलाइ र आपूर्ति कमी निम्त्याउन सक्छ। यसको प्रत्यक्ष असर अष्ट्रेलियाजस्ता आयातमा निर्भर देशहरूमा पर्ने सम्भावना रहेको बताइएको छ।

अष्ट्रेलियाले आफ्नो अधिकांश पेट्रोल र डिजेल विदेशबाट आयात गर्ने भएकाले आपूर्ति घटेमा बजारमा मूल्य थप बढ्ने अनुमान गरिएको छ। ऊर्जा क्षेत्रका विज्ञहरूका अनुसार मध्यपूर्वमा जारी तनाव र Iran सम्बन्धी द्वन्द्व लम्बिँदै गएमा अन्तर्राष्ट्रिय तेल बजारमा थप उतारचढाव देखिन सक्छ।