अस्ट्रेलिया सरकारले देशमा भित्रिने खुद बसाइँसराइको सङ्ख्यामा तीव्र र ठूलो कटौती गर्ने तयारी गरेको छ। गृह तथा अध्यागमन मन्त्री टोनी बर्कले बसाइँसराइ नियन्त्रण गर्नका लागि नयाँ नीतिगत प्याकेज तयार पारेका छन्, जसबारे अस्ट्रेलियाली मन्त्रिपरिषद्मा गहन छलफल भएको छ।

अस्ट्रेलियाली राष्ट्रिय समाचार संस्था एबीसी का अनुसार, मन्त्री बर्कले नेसनल प्रेस क्लबमा गर्ने सम्बोधनका क्रममा यो अध्यागमन कटौतीको नयाँ खाका सार्वजनिक गर्नेछन्।

नेपाली समुदाय र भिसा आवेदकका लागि प्रमुख असरहरू:

अस्ट्रेलियामा अध्ययनरत वा बसोबास गरिरहेका नेपालीहरू तथा नेपालबाट अस्ट्रेलिया जाने योजना बनाइरहेका आवेदकहरूका लागि यो नयाँ कदम निकै चासोको विषय बनेको छ:

अस्ट्रेलियाभित्र रहेका आवेदकलाई प्राथमिकता:

अध्यागमन विभागले अस्ट्रेलियाभित्रै रहेका  दक्ष आवेदकहरूलाई भिसा प्रोसेसिङमा पहिलो प्राथमिकता दिन थालेको छ। अस्ट्रेलियामै रहेका जनशक्तिलाई पहिले प्रयोग गर्ने र नयाँ बसाइँसराइ घटाउने सरकारको मुख्य रणनीति देखिन्छ।

नेपालबाटै आवेदन दिनेहरूलाई असर:

स्वास्थ्य शिक्षण र निर्माण बाहेकका अन्य क्षेत्रमा नेपाल वा विदेशबाटै  नयाँ भिसा आवेदन दिनेहरूका लागि भिसा प्रक्रिया प्राथमिकताको तल्लो सूचीमा परेको छ। यसले गर्दा नेपालबाट सीधा अस्ट्रेलिया आउने प्रक्रिया अझ सुस्त वा कठिन हुन सक्छ।

अन्तर्राष्ट्रिय विद्यार्थी र अस्थायी भिसामा कडाइ:

अस्ट्रेलियामा देखिएको आवास सङ्कट (Housing Crisis) र जनसङ्ख्याको चापलाई नियन्त्रण गर्न सरकारले अन्तर्राष्ट्रिय विद्यार्थी र अस्थायी भिसावाहकहरूको सङ्ख्यामा सीमा तोक्ने तथा नियमहरू थप कडा बनाउने तयारी गरेको छ।

सीप र योग्यताको कदर:

अस्ट्रेलियाभित्रै रहेका तर आफ्नो सीप अनुसारको काम नपाएका हजारौँ प्रवासी कामदारहरूलाई बजारमा राम्रोसँग समायोजन गर्न सरकारले ‘अनसोर’ दक्ष जनशक्तिका लागि केही सहज वातावरण बनाउने प्रयास गरिरहेको छ।